“Ўзбекистон элчиси Каромиддин Гадоев Малайзиянинг “Pro Events and Marketing Sdn Bhd” компаниясининг бошқарув директори Элайне Тхам билан учрашув ўтказди”, – деб хабар қилмоқда “Дунё” АА.

Унда Ўзбекистонда Малайзиянинг мазкур компанияси иштирокида инвестиция лойиҳаларини амалга ошириш истиқболлари муҳокама қилинган.

Малайзия томони Ўзбекистонда электр скутерлар (3 ва 4 ғилдиракли ихчам электромобиль) ишлаб чиқариш лойиҳасини амалга ошириш имкониятларини кўриб чиқаётганини маълум қилган. “Дастлабки ҳисоб-китоблар асосида йиллик ишлаб чиқариш миқдори 5 мингта скутерни ташкил этиши кўзда тутилмоқда. Кейинчалик Марказий Осиё мамлакатларига экспорт қилиш салоҳиятларини инобатга олган ҳолда, уни 10 мингтага етказиш имконияти мавжуд. Скутерлар ишлаб чиқаришни маҳаллийлаштириш Ўзбекистонда аҳолига етказиб бериш хизматининг сифатини янада оширишга хизмат қилиши мумкин”, – деган компания бошқарув директори Элайне Тхам.

Шунингдек, хориж томони Ўзбекистонда соғлиқни сақлаш соҳасида сунъий интеллект ёрдамида инсонларда тиббий диагностика ўтказиш дастурий таъминотини жорий қилиш бўйича ҳамкорликка тайёрлигини билдирган.

Учрашув якунида белгиланган лойиҳаларни амалга ошириш истиқболларини ўрганиш учун компания раҳбариятининг Ўзбекистонга бизнес-миссияни ташкил этишга келишиб олинган.

• Malayziya
• Ўзбекистон
• Скутер
• elektr
• kompaniya