2023−2024 йилларда Ташқи меҳнат миграцияси агентлигига, шунингдек, 2025 йилда Миграция агентлигига хорижга ишга юбориш хизматлари учун тўлов қилган, аммо хорижий иш берувчи томонида юзага келган айрим ташкилий ёки бошқа ҳолатлар туфайли ишга жўнаб кетмаган фуқаролар маблағларини қайтариб олиши мумкин. Бу ҳақда агентлик матбуот хизмати хабар бермоқда.

Бунинг учун аризани электрон тарзда xorijdaish.uz платформаси орқали юбориш талаб этилади. Фуқаролар аввало платформада рўйхатдан ўтиб, тўловни қайтариш бўлимига кириши керак.

Ариза топшириш жараёнида кетиш режалаштирилган давлат, тўлов амалга оширилган йил, телефон рақами ва тўланган сумма кўрсатилади. Мавжуд бўлса, тўлов квитанцияси ҳам юкланади.

Шунингдек, банк маълумотлари — карта эгасининг исм-шарифи, пластик карта рақами, банк транзит рақами, СТИР ва МФО — тўлиқ киритилиши лозим. Барча маълумотлар юборилгандан сўнг телефон рақамига тасдиқловчи СМС хабар юборилади.

Аризалар Миграция агентлигининг тегишли бошқармалари томонидан кўриб чиқилади. Маълумотлар тасдиқланса, тўланган маблағ фуқаро кўрсатган банк картасига ўтказилади. Ариза юбориш муддати 2026 йил 20 мартга қадар этиб белгиланган.

• Агентлик
• Миграция