Молдовада Украинага қарши урушда фойдаланилаётган “Z” ва “V” рамзларидан фойдаланиш тақиқланди. Шунингдек, бу тақиқ остига нафақат МДҲ давлатларида 9 май куни намойишкорона тақиладиган, балки айни вақтда Украинадаги урушда рус ҳарбийлари томонидан қўлланилаётган “георгий тасмаси” ҳам тушган.   

Бу ҳақда кеча, 7 апрел куни мамлакатдаги ҳукмрон партия PAS хабар берган.

Парламент мажлисида мазкур партия Молдовада “ҳарбий тажовуз, уруш жиноятлари ва инсониятга қарши жиноятлар”ни тарғиб қилувчи рамз ва белгиларни тақиқлаш заруратини илгари сурган.

Эндиликда мазкур рамз ва белгиларни мамлакат ҳудудида тарқатиш жаримага сабаб бўлиши мумкин.

Тегишли ҳужжатга киритилган ўзгартиришларга кўра, қоидабузар шахслар 900 лей (38 евро) гача жарима ёки 60 соатгача жамоат ишларига тортилиши мумкин. Юридик шахслар учун эса максимал жарима миқдори 1800 лей (76 евро) гача бўлади.

Маълумот учун, жорий йил 1 апрел куни Украина Олий Радаси ҳам рус рамзларидан фойдаланишни тақиқлаган эди. 

• 9 май
• Молдова
• Россия
• георгий тасмаси