Жорий йилнинг 16 июль куни соат 08:30 да Наманган шаҳар ИИБга “Нурафшон” маҳалласидаги хонадонларнинг бирида 1960 йилда туғилган муқаддам судланган, фуқаро А.Т. маст ҳолатда уйида жанжал кўтариб, яқинларига хўжалик пичоғи билан таҳдид қилаётганлиги ҳақида хабар келиб тушган.

Хабарга асосан воқеа жойига маҳалла профилактика кичик инспектори катта сержант З.Тожибоев ҳамда ҳоким ёрдамчиси М.Маҳмудовлар зудлик билан етиб борганлар. Хонадонда, маст ҳолда бўла туриб, ходимнинг огоҳлантирувига қарамасдан, қўлидаги хўжалик пичоғи билан ҳамла қилаётган фуқаро А.Т., профилактика кичик инспектори З.Тожибоев томонидан жисмоний куч ишлатган ҳолда зарарсизлантирилган. А.Т.нинг ҳаракатлари оқибатида атрофдагиларга зарар етмаган. Бу ҳақда Наманган вилояти ИИБ ахборот хизмати хабар берди.

Шундан сўнг, воқеа жойига етиб келган қўшимча куч ёрдамида фуқаро А.Т. шаҳар Наркология бўлимига олиб борилиб, мажбурий ётқизилган.

Ҳозирда фуқаро А.Т.га нисбатан Ўзбекистон Республикаси МЖТКнинг 183, 185 ва 194-моддалари билан ҳужжатлар расмийлаштирилиб, тўпланган ҳужжатлар жиноят ишлари бўйича Наманган шаҳар судига юборилган.

• ИИБ
• Наманган
• Pichoq
• hujum