Норвегия қироли Ҳаралд В вафотидан икки ҳафта ўтиб, унинг опаси — малика Астрид 94 ёшида оламдан ўтди. Бу ҳақда Норвегия Қироллик уйи маълум қилди.

Қироллик уйи баёнотида малика Астрид 11 сентябрь куни 94 ёшида вафот этгани қайд этилган. У қирол Ҳаралд В нинг опаси бўлган.

Ҳаралд V 28 август куни 89 ёшида вафот этган эди. У 35 йилдан ортиқ вақт давомида Норвегия тахтида бўлди. Қиролнинг вафотидан сўнг унинг ўғли Ҳаакон VIII тахтга ўтирди. У 1 сентябрь куни Ослодаги парламент — Стортингда Норвегия Конституциясига содиқлик қасамёдини қабул қилди.

Ҳаралд В вафотидан аввал қонидаги бактериал инфекция сабаб шифохонада даволанган. Қирол 9 сентябрь куни Ослодаги соборда дафн этилди. Малика Астрид унинг дафн маросимида иштирок этган. Бу унинг жамоатчилик олдидаги сўнгги кўриниши бўлган.

Малика Астрид 1932 йил 12 февралда Ослода туғилган. У Норвегиянинг бўлажак қироли Олав В ва валиаҳд малика Мартанинг иккинчи қизи эди.

1940 йилда Германия Норвегияга бостириб кирганидан сўнг Астрид онаси, опаси ва укаси билан мамлакатни тарк этган. Улар дастлаб Швецияга, кейинчалик АҚШга кўчиб ўтган ва Иккинчи жаҳон уруши якунига қадар шу ерда яшаган.

Норвегияга қайтгач, Астрид Оксфордда сиёсий тарих ҳамда ижтимоий-иқтисодий фанлар бўйича таҳсил олган.

1954 йилда онаси вафот этганидан сўнг, 22 ёшли Астрид Норвегиянинг биринчи хоними сифатида отасининг ёнида расмий вакиллик вазифаларини бажара бошлаган. У бу мақомни 1968 йилгача, яъни акаси Ҳаралд В Соня Ҳаралдсенга уйлангунига қадар сақлаб қолган.

1961 йилда Астрид тадбиркор Юхан Мартин Фернерга турмушга чиққан. Уларнинг беш нафар фарзанди бўлган. Фернер 2015 йилда вафот этган.