Президент Шавкат Мирзиёев Тошкент шаҳрида барпо этилаётган янги Ўзбекистон Миллий музейининг қурилиш жараёни билан танишди.

Музейнинг меъморий концепцияси замонавий архитектуранинг таниқли намояндаларидан бири, нуфузли Притзкер мукофоти соҳиби Тадао Андо томонидан ишлаб чиқилган.

Тадао Андонинг лойиҳалари асосида Япония, Европа ва АҚШда кўплаб музей ва маданий масканлар бунёд этилган. Унинг меъморий услуби чизгиларнинг соддалиги ва аниқлиги, макон ҳамда ёруғлик уйғунлигига ўзига хос ёндашуви билан бутун дунёда эътироф этилган.

Янги Миллий музей Марказий Осиёдаги энг йирик маданий лойиҳалардан бири бўлиши кутилмоқда. Мажмуада замонавий кўргазма заллари, кутубхона, реставрация лабораториялари ва таълим майдонлари ташкил этилади.

Мамлакатимизда тарихий ва маданий аҳамиятга эга йирик лойиҳаларни амалга оширишга дунё миқёсидаги меъморларни жалб этиш муҳимлиги таъкидланди.

Бундай иншоотлар нафақат бугунги авлод учун хизмат қилади, балки узоқ йиллар давомида халқимизнинг тарихий хотираси ва маданий меросининг ажралмас қисмига айланади.