Франция Словакияга қўшилиб, келиб чиқиши ўзбекистонлик бўлган миллиардер Алишер Усмоновни Европа Иттифоқи санкциялар рўйхатидан чиқаришни сўрамоқда. Бу ҳақда музокаралардан хабардор манбаларга таяниб, Euronews хабар берди.

Словакия аввалдан Алишер Усмонов ва миллиардер Михаил Фридманларни Россиянинг Украинага қарши уруши муносабати билан жорий этилган ЕИ санкцияларидан чиқаришни талаб қилиб келган. Энди Братиславанинг бу борадаги позициясини Париж ҳам қўллаб-қувватламоқда.

Манбаларга кўра, Франциянинг мазкур позицияси бошқа ЕИ давлатларида норозилик уйғотган. Айрим дипломатлар Парижнинг қарори ортида иқтисодий манфаатлар бўлиши мумкинлигини билдирмоқда.

Шу билан бирга, Франция Россияга қарши санкцияларнинг умумий муддатини узайтиришни қўллаб-қувватлашини билдирган. Усмоновни санкциялар рўйхатидан чиқариш талаби эса Словакия билан келишувга эришиш учун сиёсий муроса сифатида илгари сурилаётгани айтилмоқда.

Европа Иттифоқида санкцияларни узайтириш учун барча 27 давлатнинг розилиги талаб этилади. Шу сабабли биргина давлатнинг қарори ҳам жараённи блоклаши мумкин.

ЕИ элчилари 14-сентабр куни ушбу масалани яна муҳокама қилиши, якуний келишув эса 15-сентабргача қабул қилиниши кутилмоқда.

Алишер Усмонов 2022 йил февраль ойида Россиянинг Украинага кенг кўламли босқини бошланганидан сўнг ЕИ санкциялар рўйхатига киритилган. Унга нисбатан активларни музлатиш, ЕИ ҳудудига киришни чеклаш ҳамда маблағ ва иқтисодий ресурслар тақдим этишни тақиқлаш каби чоралар қўлланган.