Россия Ташқи ишлар вазири Сергей Лавров Украина Президенти Владимир Зеленский билан музокара ўтказишга тайёрлигини, бироқ музокаралар давомида Украинадаги ҳарбий ҳаракатларни тўхтатиш режалаштирилмаганини билдирди.

Лавров бу ҳақда Ню-Деҳлида ўтказилаётган BRICS саммити доирасида маълум қилди. Унинг сўзларига кўра, агар Зеленский Россия раҳбарияти билан учрашмоқчи бўлса, Москвага келиши мумкин.

Россия вазири музокараларда асосий эътибор баёнотларга эмас, якуний натижага қаратилиши кераклигини таъкидлади.

“Биз учрашишимиз, гаплашишимиз ва қарорлар қабул қилишимиз керак. Гап сўзларда эмас, натижада”, — деди Зеленский ҳам музокаралар зарурлиги ҳақидаги фикрга муносабат билдираркан.

Шу билан бирга, Россия Президенти Владимир Путиннинг матбуот котиби Дмитрий Песков Зеленскийнинг декабрь ойида Маямида бўлиб ўтиши режалаштирилган G20 саммити доирасида учрашиш таклифини рад этди. Песковнинг таъкидлашича, Путин ва Зеленскийнинг G20 саммитида учрашиши мумкин эмас ва музокаралар фақат Москвада ўтказилиши мумкин.

Владимир Путин ва Владимир Зеленский Россиянинг Украинага кенг кўламли босқини бошланган 2022 йил февралидан бери юзма-юз учрашмаган. Путин 2019 йилдан буён G20 саммитларида шахсан иштирок этмаган.

Сўнгги вақтларда Россия ва Украина ўртасидаги тинчлик музокараларини қайта тиклаш бўйича АҚШ воситачилигидаги дипломатик саъй-ҳаракатлар фаоллашган. Бироқ ҳозирча бу ташаббуслар сезиларли натижа бергани йўқ.