Тошкент шаҳрида 1 килограммдан ортиқ гашишни 26 минг АҚШ долларига сотишга уринган, аввал ҳам гиёҳвандлик билан боғлиқ жиноят учун судланган шахс қўлга олинди. Бу ҳақда Давлат хавфсизлик хизмати маълум қилди.

ДХХнинг Қорақалпоғистон Республикаси бўйича бошқармаси, Божхона ва Ички ишлар органлари ходимлари ҳамкорлигида ўтказилган тезкор тадбир давомида қўшни давлатдан олиб кирилган катта миқдордаги наркотик модда Тошкентда мусодара қилинган.

Аниқланишича, 1988 йилда туғилган, Денов шаҳрида яшовчи, муқаддам гиёҳвандлик воситалари билан боғлиқ жиноят учун судланган шахс Яккасарой туманидаги меҳмонхоналардан бирида 1 килограмм 185 грамм гашишни 26 минг долларга сотишга келишган.

У келишилган пулнинг 21 минг долларини олаётган вақтида ашёвий далиллар билан ушланди.

Шунингдек, наркотик моддани Сурхондарёдан Тошкентга олиб келган Cobalt автомобили ҳайдовчиси ҳам қўлга олинди. 1987 йилда туғилган ушбу шахс ҳам муқаддам ўғрилик билан боғлиқ жиноят учун судланган.

Ҳолат юзасидан жиноят иши қўзғатилган. Ҳозирда тергов ҳаракатлари олиб борилмоқда.