Туркиянинг Истанбул шаҳрида икки ўзбекистонлик аёлни ўлдириш ва уларнинг жасадларини бўлакларга ажратиш ишида суд ҳукми ўқилди. Суд Дилшод Турдимуродов ва Ғофуржон Камолхўжаевни икки нафар аёлни қасддан ўлдиришда айбдор деб топиб, ҳар бирини икки марта оғирлаштирилган умрбод қамоқ жазосига ҳукм қилди.

Суд қарорига кўра, судланувчилар “қасд билан, ваҳшийлик ёки қийноқ билан ўлдириш” жиноятини содир этган. Шунингдек, марҳумларнинг ўлимидан фойдаланиб, хонадондан мол-мулк ўғирлагани учун ҳар бирига қўшимча равишда икки марта 7 йилгача озодликдан маҳрум қилиш жазоси тайинланган.

Иш материалларига кўра, 36 ёшли Дурдона Ҳакимова ва 32 ёшли Сайёра Эргашалиева Истанбулнинг Умрание туманида ўлдирилган. Сайёранинг яқинлари 23 январдан бошлаб ундан хабар ололмагач, полицияга мурожаат қилган.

Тергов давомида Сайёра Дурдона яшаган хонадонда бўлгани аниқланган. Кузатув камераларидаги ёзувларда эса 23 январь куни Дилшод Турдимуродов ва Ғофуржон Камолхўжаев ҳам ушбу хонадонга киргани қайд этилган.

Кейинги куни икки эркак уйдан бир неча марта қора чиқинди пакетлари ва оқ чамадон билан чиқиб кетгани аниқланган. Орадан вақт ўтиб, Истанбулнинг турли туманларидаги чиқинди контейнерларидан инсон жасадининг бўлаклари топилган.

Судда Ғофуржон Камолхўжаев Сайёрани диний никоҳдаги турмуш ўртоғи бўлганини ва уни “номус масаласи” сабаб ёлғиз ўзи ўлдирганини билдирган. У Дурдонанинг ўлими ҳақида маълумотга эга эмаслигини айтган.

Дилшод Турдимуродов эса Дурдонани “номус масаласи” сабаб ўлдирганини тан олган. Шунингдек, унинг жасадини бўлакларга ажратганини маълум қилган.

Айблов хулосасида эса икки судланувчи жиноят вақтида биргаликда ҳаракат қилгани қайд этилган. Унга кўра, улар аввал Сайёрани пичоқлаб ўлдирган ва жасадини бўлакларга ажратган. Кейинчалик Дурдона ҳам ўлдирилиб, унинг жасади ҳам хонадондан олиб чиқиб кетилган.

Суд ҳайъати ҳар икки судланувчига икки мартадан оғирлаштирилган умрбод қамоқ жазоси ҳамда ўғрилик учун қўшимча жазолар тайинлади.