Дунёда 739 миллион нафар вояга етган инсон оддий саводхонлик кўникмаларига эга эмас. Уларнинг қарийб учдан икки қисмини аёллар ташкил этади. Бу ҳақда ЮНЕСКО маълум қилди.

Ташкилот 8-сентабр куни Халқаро саводхонлик кунининг 60 йиллигини нишонлади. ЮНЕСКО саводхонлик инсоннинг асосий ҳуқуқларидан бири эканини таъкидлади.

Сўнгги 50 йил давомида дунёда саводхонлик даражаси сезиларли ошган. Ёшлар ўртасидаги саводхонлик 1975 йилдаги 75 фоиздан 2024 йилда 93 фоизга, катталар ўртасидаги саводхонлик эса 65 фоиздан 88 фоизга етган.

Шунга қарамай, дунёда 273 миллион бола мактабга бормайди. Даромади паст ва ўртача бўлган мамлакатларда 10 ёшли болаларнинг 70 фоизи оддий матнни ўқиш ва тушунишда қийналади.

ЮНЕСКО раҳбари Ҳолид ан-Ананининг таъкидлашича, бу рақамлар нафақат бой берилган имконият ва салоҳиятни, балки инсоннинг асосий ҳуқуқлари поймол этилаётганини ҳам кўрсатади.

Халқаро саводхонлик куни ҳар йили 8-сентабрда нишонланади. Ушбу сана 1967 йилдан буён саводхонликнинг адолатли, тинч ва барқарор жамият қуришдаги аҳамиятини тарғиб қилишга хизмат қилиб келмоқда.