Конго Демократик Республикасида Эбола вируси билан тасдиқланган касалланиш ҳолатлари 7 022 тага етди. Вирус мамлакатнинг еттинчи вилояти — Жанубий Убангига ҳам тарқалди. Бу ҳақда Reuters хабар берди.

Ҳукумат маълумотларига кўра, эпидемия оқибатида 3 398 киши вафот этган. Касалланиш ҳолатлари мамлакатнинг етти вилоятида қайд этилган.

Ҳозирги эпидемияга Эболанинг Бундибугё тури сабаб бўлмоқда. У 2018–2020 йиллардаги эпидемияни ортда қолдириб, Конго Демократик Республикаси тарихидаги энг йирик ва энг кўп ўлимга сабаб бўлган Эбола эпидемиясига айланган.

Эпидемия кўлами бўйича ушбу ҳолат 2014–2016 йилларда Ғарбий Африкада юз берган Эбола эпидемиясидан кейин иккинчи ўринда турибди. Ўша даврда Гвинея, Либерия ва Серра-Леонеда 28,6 мингдан ортиқ киши касалланган, 11 мингдан зиёд одам вафот этган.

Жанубий Убанги вилоятида аниқланган дастлабки ҳолат асосий эпидемия ўчоғидан анча узоқда қайд этилган. 23 ёшли эркак 8-сентабр куни вафот этган ва унда Бундибугё туридаги Эбола вируси аниқланган.

Расмийлар биринчи тасдиқланган бемор билан алоқада бўлган шахсларни аниқлаш ва уларни кузатиш ишларини олиб бормоқда. Жаҳон соғлиқни сақлаш ташкилоти эса эпидемиянинг географик жиҳатдан кенгайиб бораётгани фонида малакали ходимлар, ҳамкор ташкилотлар ва маблағ етишмаслиги вирусга қарши курашни қийинлаштираётганини маълум қилган.