Ахборот технологиялари ва коммуникацияларини ривожлантириш вазири Шерзод Шерматов “Ўзбекистон телекоммуникация тармоқларини бошқариш Республика маркази” ДУК фаолияти билан танишув жараёнида IMEI кодлар беришда кўрсатиладиган хизматларнинг мураккаб ва ноқулай эканлигига тўхталди.

“IMEI кодларини рўйхатдан ўтказиш жараёнини истеъмолчилар учун янада осонлаштириш йўлларини топишимиз ва унга кўра, фуқаролар хизматлардан осон ва қулай фойдаланиш имкониятига эга бўлиши керак. Бунинг учун барча чораларни кўриш зарур”, – деди АКТ вазири Ш. Шерматов.

Вазир шунингдек, марказ фаолияти ва ходимлар учун яратилган шарт-шароитлар билан танишди. Марказ мутахассислари томонидан амалга оширилган ишлар, яқин келажакда ишга тушурилиши режалаштирилган лойиҳалар бўйича тақдимот намойиш этилди. Уларнинг ҳар бири бўйича алоҳида муҳокама ўтказилиб, мавжуд муаммолар ечими кўриб чиқилди.

Яқин келажакда амалга оширилаётган лойиҳалар қаторида мобил телефон рақамларини кўчириш тизими лойиҳаси ҳам борлиги таъкидланди.

Тақдимотда соҳа раҳбарлари ўз таклиф ва мулоҳазаларини билдириб, бу борадаги мавжуд муаммоларни биргаликда ўрганиш ва ҳал этиш учун зарурлигини ҳам таъкидлади.

• АКТ
• Imei
• Шерматов