Жорий йилнинг 15 февраль куни Ўзбекистон Республикаси ИИВ Жазони ижро этиш департаментининг Олмалиқдаги 14-сонли колониясидан 21 ёшли маҳкум М.П.нинг жасади чиққан. Бу ҳақда Инсон ҳуқуқлари фаоли Абдураҳмон Ташанов ўзининг Facebook саҳифасида маълум қилмоқда.

Унга кўра, Фарғона шаҳар Темурмалик кўчасида яшовчи марҳумнинг онаси Нигора Қамбарова ўғли билан шу йилнинг 26-28 январь кунлари узоқ муддатли учрашувларда бўлган.

Таъкидланишича, марҳум спортчи бўлган ва унда ҳеч қандай касаллик бўлмаган.

Шунингдек, 21 ёшли фуқаро спортнинг ушу йўналишида халқаро турнирлар ғолиби бўлиб келган. У болалигидан мазкур спорт тури билан шуғулланган. Бирор марта соғлиғидан шикоят қилмаган, унда бирор ёндош касалликлар кузатилмаган. Марҳумнинг онаси Ташанов билан суҳбатда безориликда айбланиб, 3 йилга қамалган ёлғиз ўғлининг шу йилнинг августида манзил-колонияга чиққани ва келин қидирганини айтган.

Аммо колония маъмуриятининг таъкидича, 14 февраль куни Муҳаммадқодирда миокрад инфарки ва панкреатитнинг оғир формаси кузатилиши оқибатида вафот этган. Аммо марҳумнинг онаси фарзандининг баданида қийноқ излари мавжудлиги, электрошокер изига ўхшаш чизиқлар борлигини иддао қилган.

“Бизда шубҳа туғдирган ҳозирча ягона жиҳат колония маъмуриятининг маҳкумнинг оғир аҳволда шифохонага ётқизилгани ҳақида унинг яқинларига хабар бермаганлигидир. Қўлимизда экспертиза ҳужжатлари бўлмагани боис маҳкумнинг қийноқдан ўлим топганига далолат қила олмаймиз. Аммо колония маъмуриятининг жасадни ёриб, сўнг яқинларига топширгунича бўлган жараёнда уларга хабар бермаганлиги мудҳиш хатодир. Чунки онанинг кўнглида улкан гумон қолди, 20 кун аввал соппа-соғ кўрган норғул боласининг ўлигини дабдурустдан қўлига тутқазишса, онанинг аҳволини тасаввур қилаверинг”, – деб ёзади Ташанов.

Бундан ташқари, “Қўлимдаги видеоларни тармоққа жойлашнинг иложи йўқ, тармоқдан фойдаланиш қоидаларини бузиш бўлади. Аммо уларни Омбудсман вакили ва журналистларга бердим, чора кўрилар деган умидда эмасман. Чунки колониядан ўлик чиқиши оддий ҳолга айланиб қолди” – дейди у.

• Abdurahmon Tashanov
• Маҳкум
• Қамоқхона