Педагог ва раҳбар ходимларга 1 октябрь — Ўқитувчи ва мураббийлар куни муносабати билан 1 млн 20 минг сўмгача мукофот пули берилиши мумкин. Бу Вазирлар Маҳкамасининг тегишли қарори ҳамда кейинги ўзгаришлар билан белгиланган.

2019 йил 30-сентабрдаги 823-сон қарор билан тасдиқланган низомнинг 29-бандига кўра, умумтаълим муассасалари ходимлари, жумладан раҳбарлар, Ўқитувчи ва мураббийлар куни муносабати билан Жамғарма маблағлари ҳисобидан мукофотланиши мумкин.

Аввал мукофот миқдори меҳнатга ҳақ тўлашнинг энг кам миқдорининг 50 фоизигача этиб белгиланган эди. Кейинчалик Президентнинг тегишли фармони билан педагог ва раҳбар ходимларга бериладиган мукофот миқдори меҳнатга ҳақ тўлашнинг энг кам миқдорининг 75 фоизигача оширилди.

Ҳозирда Ўзбекистонда меҳнатга ҳақ тўлашнинг энг кам миқдори 1 млн 360 минг сўмни ташкил этади. Унинг 75 фоизи эса 1 млн 20 минг сўмга тенг.

Шу сабабли педагог ва раҳбар ходимларга 1 октябрь муносабати билан 1 млн 20 минг сўмгача мукофот пули берилиши мумкин.

Бунда мукофот миқдори ўқитувчининг ойлик маошидан эмас, балки амалдаги меҳнатга ҳақ тўлашнинг энг кам миқдоридан келиб чиқиб ҳисобланади.