Афғонистоннинг Балх вилоятида Ўзбекистон томонидан молиявий қўллаб-қувватланаётган мадраса қурилиши бошланди.

Маълум бўлишича, мадраса 60 сотих майдонда жойлашади ва у ерда 1000 нафар талабага диний таълим берилади. Шу йилнинг 21 август куни бўлиб ўтган қурилишни бошлаш маросимида Балх вилояти губернатори ўринбосари Нурул-Ходий Абу Идрис ва Ўзбекистоннинг Афғонистондаги Бош консули Фарҳод Назаров иштирок этди.  

Бош консулнинг маълум қилишича, мадраса қурилишига 6 миллион доллар сарфланади.

“Бу диний мактаб Балх ҳокимининг илтимосига биноан қурилмоқда. Биз бу лойиҳага бир йил вақт ажратдик, шу вақтгача у тугалланади”, – деган Фарҳод Назаров.

Эслатиб ўтамиз, мадрасанинг қурилиши Ўзбекистон Ташқи ишлар вазирлиги раҳбари Бахтиёр Саидов ва “Толибон” етакчилари ўртасида жорий йилнинг 12-13 март кунлари бўлиб ўтган музокаралар доирасида келишиб олинган эди.

• Афғонистон
• мадраса