Ўзбекистонда аҳолига суюлтирилган газ етказиб бериш тизимини ислоҳ қилиш доирасида янги компания ташкил этиш таклиф қилинди. Бу ҳақда Президент матбуот хизмати маълум қилди.

Унга кўра, “Ҳудудгазтаъминот” таъсисчилигида ЛПГ-Траде МЧЖ ташкил этилади. Компания суюлтирилган газни биржа орқали харид қилиб, белгиланган тартибда аҳолига етказиб бериш билан шуғулланади.

Янги тизимда ижтимоий ҳимояга муҳтож оилаларни қўллаб-қувватлашга алоҳида эътибор қаратилади. Бунда эҳтиёжманд аҳолига харид қилинган суюлтирилган газнинг ҳар бир килограмми учун компенсация тўлаш механизми жорий этилиши кўзда тутилмоқда.

Шунингдек, ижтимоий соҳа объектларига суюлтирилган газ биржа нархларида етказиб берилади. Аҳолига белгиланган нархда сотиш натижасида юзага келадиган тафовут эса республика бюджети ҳисобидан қопланиши режалаштирилган.

Суюлтирилган газ етказиб беришда хусусий сектор иштироки ҳам кенгайтирилади. Дастлаб Андижон вилоятида хусусий операторларни жалб этиш бўйича пилот лойиҳа амалга оширилиши режалаштирилган. Операторлар тегишли лицензия ва рухсатномаларга эга бўлиши, малакали мутахассисларни жалб қилиши ҳамда аҳолига мобил илова ва онлайн хизматлар орқали хизмат кўрсатиши талаб этилади.

Бундан ташқари, истеъмолчилар сони ва ҳудудий масофадан келиб чиқиб, шаҳарсозлик ҳамда ёнғин хавфсизлиги талабларига жавоб берадиган газ шохобчалари ташкил этилади. Кейинчалик ушбу тажрибани бошқа ҳудудларда ҳам жорий этиш кўзда тутилмоқда.

Президент Шавкат Мирзиёев мутасаддиларга суюлтирилган газ етказиб бериш графигини қатъий йўлга қўйиш, ҳисоб-китобларни рақамлаштириш ва тақсимотда шаффофликни таъминлаш бўйича топшириқлар берди.