Ўзбекистон Республикаси фуқароларини Яқин Шарқдаги хавфли вазиятлар сабабли олиб чиқиш ишлари давом этмоқда. Ҳозирги вақтда Баҳрайн, Қувайт, Сурия, Ироқ, Эрон, Қатар ва Исроил ҳаво ҳудуди парвозлар учун ёпиқ бўлиб турибди.

28 февралдан 7 март эрталаб соат 10:00 ҳолатига кўра, Мадина ва Жидда аэропортларидан 63 та парвоз амалга оширилиб, 13 543 нафар Ўзбекистон фуқароси олиб келинган. Дубай аэропортидан эса 9 та парвозда 1 401 нафар фуқаро Ўзбекистонга қайтарилган.

Шунингдек, хорижий авиакомпаниялар Fly Nas (5 та) ва Fly Dubai (3 та) орқали Жидда ва Дубайдан Тошкент ва Наманган йўналишларида парвозлар амалга оширилиб, жами 1 365 нафар йўловчи келтирилган. Бунда Ўзбекистон фуқароларининг сони 990 тани ташкил этади.

“Ўзавиатсия” агентлиги ва Ташқи ишлар вазирлигида 24/7 режимида фаолият юритувчи штаб ва Cалл-марказлар ишламоқда. Ҳозирда Қатар ҳудудида қолган фуқароларни Саудиянинг Риёз аэропорти орқали олиб чиқиш ишлари ҳам ташкил этилмоқда.

Транспорт вазирлиги туроператор ва агентларни юзага келган форс-мажор ҳолатларида ҳам мижозлар ҳуқуқларини таъминлашга, суғурта полисларидан тўғри фойдаланишга ва авиакомпаниялар билан авиачипталарни хавфсиз йўналишларга ўзгартириш орқали фуқароларни олиб чиқишга чақирмоқда.

Ҳозирги вақтда Қувайт, Қатар ва Баҳрайнга яқин бўлган Саудиянинг Даммам ва Риёз аэропортларида халқаро йўналишларда мунтазам авиақатновлар давом этмоқда, авиачипталар сотувда мавжуд. Шунингдек, Жидда ва Мадина йўналишларидаги парвозлар ҳам нормал режимда амалга оширилмоқда.

Фуқаролардан эҳтиросларга берилмаслик, ўз туроператорлари ва агентлари билан мунтазам алоқада бўлиш тавсия қилинмоқда.

• Ўзбекистонлик
• Transport vazirligi
• parvoz