Бунга ис газидан заҳарланиш сабаб бўлган.

Қозоғистоннинг Манғистов вилояти Мўйноли туманидаги хусусий турар жой биносида 7 нафар Ўзбекистон фуқароси ис газидан вафот этди. Бу ҳақда Nur.kz хабар бермоқда.

Бахтсиз ҳодиса 2 март куни Басқудуқ қишлоғидаги хусусий уйда содир бўлган. Ёрдамга етиб келган қутқарувчилар ва тез тиббий ёрдам бригадалари воқеа жойида етти кишини аниқлаган. Улардан беш нафари вояга етмаганлар бўлган, барчаси вафот этган.

Манғистов вилояти Фавқулодда вазиятлар бошқармасининг маълум қилишича, ҳодиса газ ускуналаридан фойдаланиш қоидаларининг бузилиши оқибатида юз берган.

“Қурбонларнинг бари Ўзбекистон фуқаролари бўлиб, Қозоғистонда вақтинча истиқомат қилган”, – дейилади ҳокимлик хабарида.

Маълум қилинишича, ҳалок бўлган оиланинг яқинларига ҳар томонлама ёрдам кўрсатилади, жумладан, дафн маросими ўтказилади. Вазият Мангистов вилояти ҳокимининг шахсий назоратига олингани айтилмоқда.

• Ис гази
• Қозоғистон
• Заҳарланиш