Қозоғистон коррупсионерларнинг оммавий реестрини яратиш ниятида. Бу ҳақда Коррупцияга қарши курашиш агентлиги раисининг биринчи ўринбосари Улан Сарқулов маълум қилди.

“Бу профилактика воситаси бўлиб, унинг асосий мақсади – жамоатчиликнинг қоралаши орқали жамиятда коррупцияга нисбатан қаршиликни шакллантиришдан иборат. Реестрга оғир ва ўта оғир коррупция жиноятларини содир этганликда айбдор деб топилган шахслар тўғрисидаги маълумотлар киритилади. Жисмоний шахсларни реестрга киритиш учун суднинг қонуний кучга кирган айблов ҳукми асос бўлади”, – деган Сарқулов.

Мажлис депутатлари ушбу янги қонун лойиҳасини биринчи ўқишда маъқуллаган.

Реестр Коррупцияга қарши курашиш агентлигининг веб-сайтига жойлаштирилади. Унда коррупцияга учраган мансабдор шахснинг фамилияси ва исми, унинг иш жойи ва жиноят содир этилган пайтдаги лавозими, жиноят таркиби, айблов ҳукми тафсилотлари ва тайинланган жазо кўрсатилади.

Ушбу “қора рўйхат”дан чиқариш қонуний кучга кирган ва судланганлик олиб ташланган оқлов ҳукми асосида амалга оширилади.

• Амалдорлар
• Коррупция
• Қозоғистон