Жиноят ишлари бўйича Тошкент шаҳар судида 8-октабр куни «Реал Санжик» номи билан танилган тадбиркор Санжар Каримовга нисбатан суд ҳукми ўқилди. Суд ҳукмига кўра, унга тайинланган 5 йил муддатга озодликдан маҳрум қилиш жазоси ўзгаришсиз қолдирилди.

Суд қарорига кўра, Жиноят кодексининг 168-моддаси учинчи қисми «а» банди бўйича тайинланган 5 йиллик озодликдан маҳрум қилиш жазоси аслича қолдирилган. Шунингдек, Жиноят кодексининг 59–61-моддаларига асосан жазоларни тўлиқ қўшиш йўли билан узил-кесил 5 йил озодликдан маҳрум қилиш ҳамда БҲМнинг 400 баравари, яъни 136 миллион сўм миқдорида жарима жазоси тайинланган.

Бундан ташқари, Жиноят кодексининг 61-моддасига асосан тайинланган жазолар алоҳида-алоҳида ижро этилиши белгиланди. Ҳукмнинг қолган қисми ўзгаришсиз қолдирилиб, апелляция шикоятлари қисман қаноатлантирилди.

Эслатиб ўтамиз, Жиноят ишлари бўйича Мирзо Улуғбек тумани суди 8 май куни Санжар Каримовни фирибгарлик, ўлдириш ёки зўрлик ишлатиш билан қўрқитиш ҳамда гиёҳвандлик воситалари билан боғлиқ жиноятларни содир этганликда айбдор деб топган. Унга 5 йил муддатга озодликдан маҳрум қилиш ва 410 БҲМ миқдорида жарима жазоси тайинланган.

Шу тариқа, Тошкент шаҳар суди апелляция босқичида Санжар Каримовга тайинланган асосий 5 йиллик озодликдан маҳрум қилиш жазосини ўзгаришсиз қолдирди.