Туркманистон раҳбари Сердар Бердимуҳамедов “Туркманистон Қаҳрамони” унвонини олди.

Президент мамлакат Халқ кенгаши йиғилишида тақдирланди. Интерлиса раҳбари Дунягозел Гулманова парламентнинг Бердимуҳамедовни тегишли унвон билан тақдирлаш ҳақидаги қарорини ўқиб эшиттирди. “Ҳужжатда Туркманистон раҳбарининг Туркманистон миллий мустақиллиги ва бетарафлиги тамойилларини мустаҳкамлашга қўшган улкан шахсий ҳиссаси, давлат ва жамият олдидаги улкан хизматлари, инновацион ташаббуслари қайд этилган”, – дейилади агентлик нашрида.

Ушбу мукофот энг юқори даражадаги фарқ бўлиб, Туркманистон давлати ва халқи олдидаги алоҳида хизматлари учун фуқароларга берилади.

Маълумот ўрнида, Сердар Бердимуҳамедов 2022 йилнинг март ойида президентлик сайловларида 72,97 фоиз овоз билан ғалаба қозонганидан сўнг, Туркманистон президенти лавозимини эгаллаган эди.

Эслатиб ўтамиз, жорий йилнинг 22 сентябрь куни Туркманистон президенти 42 ёшни қарши олди. Туғилган кун муносабати билан кўплаб давлат раҳбарлари қатори Шавкат Мирзиёев ҳам Бердимуҳамедовга қўнғироқ қилиб, табриклади.

• Президент
• Қаҳрамон
• Туркманистон