Ижтимоий тармоқларда “Жиззахда ўқитувчи “Шуҳрат” медали билан тақдирланганини пахта даласида эшитди” сарлавҳаси остида тарқалган хабар Одам савдосига қарши курашиш ва муносиб меҳнат масалалари бўйича миллий комиссия томонидан ўрганилди.

Жиззах шаҳридаги 22-умумий ўрта таълим мактабининг бошланғич синф ўқитувчиси Гулбаҳор Саидмурадовна Самадова пахта йиғим-теримида якшанба куни қўшимча даромад топиш мақсадида иштирок этаётганлиги, уни ушбу ишда қатнашиш учун ҳеч қандай мажбурлаш ҳолати бўлмаганлиги аниқланган.

Шу билан бирга, Миллий комиссия ходимларга уларнинг функционал вазифаларига кирмайдиган ишларга жалб қилиш ҳолатларини қонунчиликка зидлигини ҳамда бу ишлар учун маъмурий ва жиноий жавобгарлик белгиланганлигини эслатиб ўтган.

“Агар Сиз мажбурий тарзда бирор-бир меҳнатга жалб этиш, муносиб меҳнат ва дам олиш шароитларини яратиш билан боғлиқ муаммоларга дуч келсангиз, “1176” ҳамда “1092” рақамли ишонч телефонига мурожаат қилишингизни сўраймиз”, – дейилади Миллий комиссия муносабатида.

Эслатиб ўтамиз, Жиззах шаҳридаги 22-умумий ўрта таълим мактабининг бошланғич синф ўқитувчиси Гулбаҳор Самадованинг 11 сентябрь куни қабул қилинган “Ўқитувчи ва мураббийлар куни муносабати билан таълим-тарбия тизимида алоҳида ўрнак кўрсатган ходимлардан бир гуруҳини мукофотлаш тўғрисида”ги Президент фармони билан давлат мукофотига – “Шуҳрат” медалига лойиқ кўрилган эди. Унинг бу хушхабарни пахта даласида эшитганлиги ҳақидаги видеохабар кенг жамоатчиликнинг эътирозларига сабаб бўлган.

• Жиззах
• O‘qituvchi
• Пахта