Аввалроқ, Сурхондарё вилоятининг Узун туманида эркак аёли ва унинг янги туғилган фарзандига нисбатан тазйиқ ва зўравонлик қилиб, уларни 5 ой давомида мажбуран молхонада сақлагани ҳақида хабар берилганди. Аёл ва унинг боласига ваҳшийларча муносабатда бўлганларга суд ҳукми ўқилди. Бу ҳақда Олий суд матбуот котиби Азиз Обидов хабар берди.

Маълум бўлишича, 2025 йилнинг 26 август куни Узун туманидаги маҳаллаларнинг бирида номаълум аёл киши антисанитария ҳолатида хонадон эгалари томонидан молхонада мажбурий ушлаб турилгани ҳақида ИИБга хабар тушган. Шунга асосан, маҳалла профилактика инспектори зудлик билан воқеа жойига етиб бориб, хонадон эгаларининг қаршилигига қарамасдан молхона эшигини бузган. Натижада 1981 йилда туғилган хонадон эгаси Ш.А. молхонада 1997 йилда туғилган турмуш ўртоғи Х.Г. ва унинг 5 ойлик ўғил фарзандини оғир шароитда мажбурлаб сақлаб келаётгани аниқланган. Жабрланувчилар зудлик билан тиббиёт муассасасига жойлаштирилган.

Ҳолат ўрганилганда хонадон эгаси фуқаро Ш.А. шу хонадонда яшовчи онаси ва яқин қариндошлари билан олдиндан тил бириктириб, турмуш ўртоғи Х.Г.ни руҳий ҳолатидаги ўзгаришлари борлигидан (тилида нуқсони борлиги, фикрларини тўлиқ баён қилишга қийналиши) фойдаланиб, бир неча ой давомида унга нисбатан тазйиқ ва зўравонлик ишлатиб, мажбурлаб, хонадон ичидаги молхонада яширин равишда сақлаб келгани аниқ бўлган.

Жиноят ишлари бўйича Узун туман судининг ҳукми билан А. Ш. Жиноят кодексининг 126-1-моддаси (оилавий зўравонлик), 127- (вояга етмаган шахсни ғайриижтимоий хатти-ҳаракатларга жалб қилиш), 25,135- (одам савдоси) ва 138-моддаларида (зўрлик ишлатиб ғайриқонуний равишда озодликдан маҳрум қилиш), М. Ш. (аёл, 1975 йилда Сурхондарё вилоятида туғилган), К. Ш. (аёл, 1978 йилда Сурхондарё вилоятида туғилган) ва З. А. (аёл, 1951 йилда Сурхондарё вилоятида туғилган) 104- (қасддан баданга ўртача оғир шикаст етказиш), 127- (вояга етмаган шахсни ғайриижтимоий хатти-ҳаракатларга жалб қилиш), 25,135- (одам савдоси) ва 138-моддаларида (зўрлик ишлатиб ғайриқонуний равишда озодликдан маҳрум қилиш) назарда тутилган жиноятларни содир этганликда айбдор деб топилган.

Суднинг ҳукми билан А. Ш.га 13 йил, М. Ш. ва К. Ш.га 9 йил муддатга озодликдан маҳрум қилиш жазоси, З. А.га 5 йил муддатга озодликни чеклаш жазоси тайинланган.

• Chaqaloq
• Жиноят
• Суд