2026 йилда рамазон ойининг биринчи куни 19 февраль, пайшанба кунига, Рамазон ҳайити эса 20 март, жума кунига тўғри келиши кутилмоқда. Бу ҳақда Туркий давлатлар ташкилоти (ТДТ) Мусулмон диний идоралари раҳбарлари кенгашининг Фатво ҳайъати Самарқандда бўлиб ўтган йиғилишида белгиланган.

Маълум қилинишича, 2026 йил 2–4 февраль кунлари Самарқанд шаҳрида Туркий давлатлар ташкилоти мамлакатлари Мусулмон диний идоралари раҳбарлари кенгаши ҳузуридаги Фатво ҳайъатининг маслаҳат йиғилиши бўлиб ўтди. Ўзбекистон мусулмонлари идораси раҳбарлигида ташкил этилган тадбирда ташкилотга аъзо мамлакатлар диний идоралари вакиллари ва ислом уламолари иштирок этди.

Рамазон ойининг биринчи куни ва Рамазон ҳайити ҳақида қабул қилинган ушбу қўшма қарор туркий давлатларнинг ўз мусулмон жамоалари бирлигини мустаҳкамлаш ва диний амалиётларни замонавий илмий кашфиётлар билан уйғунликда сақлашга содиқлигини яна бир бор намойиш этади.

Ушбу Фатво ҳайъатига ТДТ аъзо мамлакатлар - Туркия, Озарбайжон, Қозоғистон, Қирғизистон, Ўзбекистон ва ТДТ кузатувчи давлатлари Туркманистон ва Венгрия расмий мусулмон диний идоралари вакиллари киради.

• Hayit
• Ramazon