Термиз тумани Дўстлик маҳалласидан салжуқийлар даврига оид олтин динор топилди.

Хабарда айтилишича, ушбу маҳаллада яшовчи Улкан Эралиев боғни суғориш чоғида ердан сариқ металл парчасини топиб, Термиз археология музейига мурожаат қилган. Топилма аниқланган жойдан, шунингдек, қорахонийлар ва салжуқийлар даврига оид кулолчилик буюмлари парчалари ҳам топилган.

Улкан Эралиев қимматбаҳо топилмани белгиланган тартибда Термиз археология музейига топширган ва унга амалдаги қоидаларда белгиланган тартибда ҳақ тўлаб берилган.

Музей директори бошчилигидаги музей мутахассислари ва нумизматлари томонидан қимматбаҳо топилма дастлабки экспертизадан ўтказилди.

“Олтин динорнинг олд томонида музей нумизмати докторанти Мансур Нормўминов “Аллоҳ” ва “Муҳаммад” сўзларини, шунингдек, араб алифбосининг айрим ҳарфларини ўқишга муваффақ бўлди. Танганинг орқа томонидаги матн деярли ўчиб кетган. Шикастланган, лекин яхши сақланиб қолган танга – олтин динорнинг оғирлиги 1,92 граммни ташкил қилган.  Маълумки, мусулмон мамлакатларида тилла тангалар “динор”, кумуш тангалар “дирҳам” деб аталар эди”, – дейди Маданий мерос агентлиги директорининг биринчи ўринбосари Турсунали Кузиев.

Қайд этилишича, бу йил Термиз археология музейи очилганига 20 йил тўлади.  20 йил давомида бу музейда бирорта ҳам тилла танга бўлмаган.

• Олтин
• Салжуқийлар
• Термиз
• Хазина