Қашқадарёнинг Китоб туманида туғилган, ҳозирда Навоий шаҳрида истиқомат қилаётган А.Ю. шу йилнинг февраль ойларида Қозоғистоннинг Олмаота шаҳрида юрган пайтида сархуш ҳолда TikTok платформаси орқали жонли эфирга чиқиб, давлат раҳбарининг шаъни ва қадр-қимматини камситувчи, ўта қўпол, ахлоқсиз тарзда турли хил кўринишдаги уятсиз сўзлар билан ҳақорат қилган чиқиши айрим қўштирноқ ичидаги блогерлар кўмагида бутун жаҳон ижтимоий тармоқларида айланди. Мазкур видео жамиятда қаттиқ резонанс ҳодисасини пайдо қилиб, ўзбекистонликларнинг ҳақли эътирозига сабаб бўлди.

Чет давлатларида бўлиш муддати тугаган А.Ю. Туркия, сўнг Озарбайжонда бўлиб, бир муддат қилмишлари унутилишини кутди. Аммо қонун устувор, жазо муқаррар. Президент Давлат хавфсизлик хизмати ходимлари томонидан амалга оширилган тезкор тадбирлар натижасида А.Ю. апрель ойида Озарбайжонда қўлга олинди.

“Мен, 2023 йил февраль ойида “Шерхон” номли TikTok профилимда юртбошимизни ҳақорат қилганман. Юртбошимиздан, халқимиздан, ҳаммадан узр сўрайман. Қилган ишимдан қаттиқ пушаймонман. Мен билмаган ҳолатда бу гапларни гапириб қўйганман. Қайтиб ҳеч қачон бу гапни гапирмайман. Илтимос, мени кечиришларингизни ҳаммадан сўрайман” – дейди судланувчи.

У Ўзбекистонда яшаган вақтлари ҳам ўғрилик, безорилик каби жиноятларни содир этган ва инсонпарварлик тамойили асосида уни ахлоқ тузатиш билан жазолаганди.

Суд ҳукмига кўра, А.Ю. ЖКнинг 158-моддаси учинчи қисми билан айбли деб топилиб, 4 йил муддатга озодликдан маҳрум қилиш жазоси тайинланди.

• ДХХ
• Jazo
• Президент
• fuqaro