Толибон Афғонистонда интернет бутунлай узилгани ҳақидаги хабарларни рад этди. Al Jazeera хабарига кўра, Толибон бу ҳолатни “эскирган толали-оптик кабелларни алмаштириш билан боғлиқ вақтинчалик техник муаммо” деб изоҳлади.

“Интернетни тақиқлаганимиз ҳақидаги гаплар асоссиз”, — дейилади Толибоннинг расмий баёнотида.

Бироқ, Netblocks глобал тармоқ кузатув ташкилоти 29 сентябрь куни Афғонистонда — 43 миллион аҳолига эга мамлакатда — тўлиқ интернет блокланганини қайд этди. Телефон алоқасида ҳам муаммолар юзага келган.

Толибон аввал ҳам айрим вилоятларда “ахлоқий бузилишларга қарши кураш” сабабли интернет хизматларини чеклаб келган. Мисол учун: Сентябрь ойида Балх вилоятида толали-оптик интернет бутунлай тўхтатилган.

Бадахшон, Тахор, Ҳилманд, Қандаҳор ва Нангарҳор вилоятларида ҳам шунга ўхшаш чекловлар жорий этилган.

TOLOnews телеканали хабарига кўра, Толибон мобил қурилмаларда 3G ва 4G хизматларини бир ҳафта ичида тўхтатиш бўйича топшириқ берган. Маҳаллий манбаларга кўра, 8 мингдан ортиқ алоқа устунлари вақтинча ўчирилган.

Интернетнинг узилиши нафақат шахсий мулоқот, балки авиация, банк тизими ва савдо фаолиятига ҳам салбий таъсир кўрсатган. Бу воқеа мамлакат шарқида 2 мингдан ортиқ одам ҳалок бўлган кучли зилзиладан атиги бир неча ҳафта ўтиб содир бўлди. 1 октябрь куни мамлакатда интернет ва алоқа хизматлари қайта тикланган.

• Афғонистон
• Интернет
• Tolibon