Сирдарё вилоятининг Оқолтин туманида савдо билан шуғулланувчи аёлга шаҳвоний шилқимлик қилган эркакка нисбатан суд қарори чиқарилди. У 5 суткага маъмурий қамоқ жазосига ҳукм қилинди. Бу ҳақда «Миллар» дастурида хабар берилди.

Маълум қилинишича, эркак М-39 автомобиль йўли бўйида савдо қилаётган аёлнинг ёнига маст ҳолатда келиб, пул эвазига жинсий алоқа қилишни таклиф қилган ва унга шаҳвоний шилқимлик қилган. Шундан сўнг аёл ички ишлар органларига мурожаат қилган.

Суд мажлисида эркак қилмишини маст ҳолатда содир этганини тан олиб, енгиллик сўраган. Жабрланувчи эса унга нисбатан қонун доирасида қатъий чора кўрилишини талаб қилган.

Суд қарорига кўра, эркак Маъмурий жавобгарлик тўғрисидаги кодекснинг 41¹-моддаси 1-қисми (шаҳвоний шилқимлик қилиш) билан айбдор деб топилиб, 5 сутка маъмурий қамоқ жазосига тортилган. Шунингдек, жабрланувчига моддий ва маънавий зарарларни ундириш учун фуқаролик ишлари бўйича судга мурожаат қилиш ҳуқуқи тушунтирилган.