Экология ва иқлим ўзгариши миллий қўмитаси Давлат экологик назорат инспекциясига (Экополитсия) келиб тушган мурожаат асосида Тошкент шаҳри, Шайхонтоҳур тумани, “Юнона” МФЙ, Абу Али ибн Сино кўчаси ҳудудида ўрганиш ишлари олиб борилди. Ҳудуддаги ёпиқ коллектор ҳудуди ўрганилганида 108 туп дарахт ноқонуний кўчириб ўтқазилганлиги аниқланди. Дарахтларнинг ҳолати ўрганилганида 107 туп дарахт, яъни 12 туп можжевелник (арча) ҳамда 95 туп Элдор қарағайи қуриб қолганлиги аниқланди.

Таъкидлаш жоизки, бу дарахтлар юзасидан Тошкент шаҳар экология бош бошқармасига мурожаат қилинган ва бошқарма томонидан рад жавоби берилган. Аммо, шундай бўлса-да, дарахтлар ноқонуний тарзда кўчириб ўтқазилган.

Ҳуқуқбузарлик натижасида, Ўзбекистон Республикаси Вазирлар Маҳкамасининг 2022 йил 22 ноябрдаги “Давлат ўрмон фондига кирмайдиган дарахтлар ва буталарни экиш, парвариш қилиш ва улардан фойдаланиш тартибини янада такомиллаштириш тўғрисида”ги 464-сон қарорига кўра, табиатга 881 миллион 268 минг сўм миқдорида зарар етказилганлиги ҳисобланди.

Ҳолат юзасидан тўпланган ҳужжатлар ҳуқуқни муҳофаза қилувчи органларга тақдим этиш учун тайёрланмоқда.

• Давлат экология қўмитаси
• Экология
• Тошкент
• daraxt