Тошкентдаги кўпқаватли турар жой биноси йўлагида пичоқ билан юрган шахс маъмурий тартибда қўлга олинди. Бу ҳақда Тошкент шаҳар ИИББ матбуот хизмати хабар берди.

Ижтимоий тармоқларда ҳолат акс этган видео тарқалиб, аҳолининг хавотирига сабаб бўлганди. Расмий ахборотда маълум қилинишича, 5 январь куни тунги соат 01:35 ларда 1984 йилда туғилган О.С. маст ҳолатда Яшнобод туманидаги кўп қаватли уйлардан бирида қўшниси Д.Й.нинг эшигини тақиллатиб, уни безовта қилган.

У жамоат жойида бўла туриб, совуқ қурол сифатида фойдаланилиши мумкин бўлган ашёни қонунга хилоф равишда олиб юриб, жамоат тартибини бузган. Ушбу ҳолат юзасидан туман ИИО ходимлари томонидан тезкорлик билан чора кўрилган ва ҳуқуқбузар маъмурий тартибда ушланган.

Мазкур ҳолат юзасидан Яшнобод тумани ИИО ФМБ томонидан фуқаро О.С.га нисбатан Маъмурий жавобгарлик тўғрисидаги кодекснинг 183- (майда безорилик), 185-2 (совуқ қуролни ёки совуқ қурол сифатида фойдаланилиши мумкин бўлган ашёларни олиб юриш), 194- (ички ишлар органлари ходимининг қонуний талабларини бажармаслик) моддалари билан маъмурий баённома расмийлаштирилган.

Тўпланган ҳужжатлар жиноят ишлари бўйича Яшнобод тумани судига юборилган. Суд томонидан ушбу шахсга маъмурий қамоқ жазоси тайинланган.

• Ichki ishlar
• Тошкент
• ma’muriy qamoq