АҚШ президенти Доналд Трамп НАТО саммитида иштирок этиш учун Анқарага мингга яқин хавфсизлик ва хизмат ходимлари, дунёдаги энг ҳимояланган автомобиллардан бири — “Тҳе Beast” зирҳли лимузини ҳамда махсус кўчма ҳожатхонаси билан ташриф буюрди. Президент делегацияси таркибида АҚШ Махфий хизмати, дипломатик хавфсизлик ходимлари, Оқ уй вакиллари, ҳарбийлар, разведка ва техник мутахассислар ҳам бор.

Трамп фойдаланадиган “Тҳе Beast” зирҳли лимузини ҳам Анқарага етказилган. Тахминан 9–10 тонна оғирликдаги ушбу автомобиль кучли портлашлар, ракета ҳужумлари ва бошқа хавф-хатарларга қарши ҳимоя тизимлари билан жиҳозланган. Унинг зирҳли эшиклари қарийб 20 сантиметр қалинликда бўлиб, самолёт эшиклари даражасидаги ҳимояни таъминлайди. Шунингдек, Трамп билан бирга олиб келинган махсус кўчма ҳожатхона ҳам эътибор марказида бўлди. АҚШ расмийлари хорижий ташрифларда бундай амалиётни хавфсизлик нуқтаи назаридан қўллайди.

Бунга сабаб, президентнинг биологик намуналаридан унинг саломатлиги ҳақида маълумот олиниши эҳтимолининг олдини олишдир. Бундан ташқари, Трамп Анқарага қиймати 500 миллион долларга баҳоланаётган, Қатар томонидан совға қилинган Boeing самолётида етиб келди. Мазкур ҳаво кемаси замонавий алоқа ва мудофаа тизимлари билан жиҳозланган бўлиб, президент учун ётоқхона, йиғилиш заллари ҳамда парвоз вақтида давлат бошқарувини давом эттириш имконини берувчи махсус инфратузилмага эга.