АҚШ президенти Доналд Трамп Гренландия Россия ёки Хитой қўлига ўтиб кетмаслиги учун ҳудудни АҚШнинг ўзи эгаллаши лозимлигини айтди.

У Вашингтон бунга эришиш учун “оддий йўл”дан ҳам, “оғир йўл”дан ҳам бориши мумкинлигини қўшимча қилган.

Дания ва Гренландия расмийлари эса ҳудуд сотилмаслигини айтмоқда. Хусусан, Дания бош вазири Фредериксен Метте АҚШнинг эҳтимолий ҳарбий операцияси НАТО'нинг тугашини англатишини айтган.

Жума куни кечқурун Гренландиядаги асосий партиялар, жумладан, мухолифат партиялари етакчилари қўшма баёнот эълон қилиб, унда “АҚШнинг мамлакатга нисбатан беписанд муносабатига чек қўйиш”га чақирди.

“Биз америкалик бўлишни истамаймиз, даниялик бўлишни истамаймиз, биз гренландиялик бўлишни истаймиз. Гренландиянинг келажагини гренландияликларнинг ўзлари белгилашлари керак”, – дейилади баёнотда.

Сўнгги йилларда Гренландиянинг табиий ресурслари, жумладан, нодир металлар, уран ва темирни ўзлаштириш имкониятлари фаол муҳокама қилинмоқда. Глобал иқлим ўзгариши асрий музлар эриётгани туфайли уларга етиб бориш осонлашмоқда.

Олимларнинг фикрича, Гренландияда нефть ва газ захиралари ҳам кўп бўлиши мумкин.

• АҚШ
• Дания
• Газ
• Трамп
• нефть