“Умра” сафарини лицензиясиз ташкил қилмоқчи бўлганлар қўлга олинди

“Умра” тадбирларини ташкил этиш ва ўтказиш учун лицензия олиш талабларини белгилаш мақсадида Вазирлар Маҳкамасининг “Умра” тадбирларини ташкил этиш ва ўтказиш билан боғлиқ чора-тадбирларни янада такомиллаштириш тўғрисида”ги қарори қабул қилинган эди.

Ўзбекистонда ушбу қарор талабларига тўлиқ жавоб бера оладиган жами 12 та туристик фирма “Умра” тадбирларини амалга ошириш бўйича лицензияга эга бўлган.

Шунга қарамасдан фуқароларни “Умра” сафарига ноқонуний юборишга уринишлар давом этмоқда.

Марғилон шаҳрида яшовчи М.А. Фарғона шаҳрида истиқомат қилувчи 5 нафар фуқарони “Умра” зиёратига юборишини айтиб, 5700 АҚШ доллари олган вақтида ашёвий далиллар билан ушланган.

Яна бир ҳолатда эса Учкўприк туманида фаолият юритувчи туристик фирма раҳбари О.М. тегишли лицензияга эга бўлмасдан, 2 нафар фуқарони “Умра” зиёратига юбориш эвазига 2500 АҚШ доллари олган вақтида ушланган.

Шунингдек, Қўқон шаҳрида кузатилган ҳолатда, туристик фирма иш юритувчиси А.Ж. 2 нафар фуқарони алдаб, уларни “Умра” зиёратига юбориш эвазига 2400 АҚШ доллари олган вақтида ашёвий далиллар билан ушланган.

Айни пайтда мазкур шахсларга нисбатан жиноят ишлари қўзғатилиб, тергов ҳаракатлари олиб борилаётгани айтилмоқда.

• лицензия
• Умра