Соғлиқли сақлаш вазири Асилбек Худаяров Хитой Халқ Республикасининг мамлакатимиздаги Фавқулодда ва Мухтор элчиси Юй Цзюнь билан учрашув ўтказди. Вазирлик матбуот хизматининг хабар қилишича, учрашув давомида хитойлик кардиожарроҳлар томонидан жорий йилда 500 нафар юрак нуқсони бўлган бемор болада юқори технологик операциялар ўтказиш бўйича таклифлар кўриб чиқилган.

Бу амалиётлар Болалар миллий тиббиёт маркази, Республика ихтисослаштирилган хирургия илмий-амалий тиббиёт маркази ҳамда Тошкент давлат тиббиёт университети болалар кўп тармоқли клиникасида бажарилиши кўзда тутилган.

Шунингдек, мулоқотда Республика суд-тиббий экспертиза илмий-амалий марказининг моддий-техник базасини мустаҳкамлаш, қатор тиббиёт муассасаларини модернизация қилиш ҳамда юртимизда анъанавий Хитой табобатини ривожлантиришга қаратилган грант лойиҳаларини амалга ошириш истиқболлари муҳокама қилинди.

Бундан ташқари, Хитойнинг грант маблағлари ҳисобидан амалга ошириладиган лойиҳаларни жадаллаштиришга келишиб олинди.

• Ҳамкорлик
• Жарроҳлик
• Ўзбекистон
• Тиббиёт
• Хитой
• Yurak