Шу кунларда Тошкент вилоят ҳокими Зоир Мирзаев бошчилигидаги делегация Хитой Халқ Республикасида бўлиб турибди. Асосий мақсад савдо ва инвестициявий ҳамкорликни кучайтириш борасида бир қатор манфаатли учрашувлар ўтказишдир.

Ҳозир Тошкент вилоятида 700 дан ортиқ Хитой капитали асосидаги қўшма корхона фаолият юритмоқда. Уларда ўн минглаб ўзбекистонликлар меҳнат қилмоқда. Хусусан, Ўзбекистон Республикасининг ХХРдаги элчихонасида Зоир Мирзаев Шандун провинцияси тадбиркорлари билан мулоқот қилди. Музокараларда саноат, қурилиш, маиший хизмат кўрсатиш соҳаларида ҳамкорликни ривожлантириш масалалари хусусида сўз борган. 

Шунингдек, аҳоли дам олиш масканлари, хиёбон ва истироҳат боғларини қайта тикланувчи энергияга ўтказиш, “Хитой тажрибаси” асосида қайта жиҳозлаш борасида фикр алмашилган. Музокараларда Шандун провинцияси илмий-оммабоп тадқиқотлар ассоциациясининг бош котиби Су Чжитсзюн, “Скй Success International Investment Co.” ва “Скй Asia International Investment Limited” компанияси директори Сун Хайфен, “Зҳонгру Ke Xinda Construction Group Co.” қурилиш компанияси бош директори Гао Сзюнхай сингари 10 дан ортиқ таниқли тадбиркорлар иштирок этган.  

Тошкент вилояти ҳокимлиги ва “Беижинг China sciences runyu environmental technology co ltd” компанияси ўртасида ҳамкорлик меморандуми имзоланди. Унга кўра, Янгийўл шаҳрида қиймати 120 миллион доллар бўлган чиқиндини қайта ишлаш заводи қуриш режалаштирилган. Лойиҳа ишга тушса кунига 800 тонна чиқинди ёқиш орқали ишлайдиган электр станцияси аҳолига хизмат кўрсатишни бошлайди. 

Мазкур лойиҳани келгусида янада кенгайтириб, кунлик қувватини 4 минг тонна чиқиндини зарарсиз ёқиш орқали электр энергияси ишлаб чиқариш кўзда тутилган. Яратилаётган иш ўрни 150 нафардан ортади. Станция тўлиқ қувват билан ишга тушганида, 400 миллион доллар сармоя олиш кутилмоқда. 

Тошкент вилояти делегацияси вакиллари кейинги манзили Анхой провинцияси Хефей шаҳри бўлиб, у ерда ишлаб чиқариш қувватлари билан танишув ва музокаралар ўтказилиши режалаштирилган. 

• Ҳамкорлик
• Toshkent viloyati
• Хитой
• korxona