Президентнинг тегишли қарорига асосан, “Ўзбекистон темирйўллари” АЖ 200 та йўловчи вагонини янгилаш учун 143 миллион доллар миқдорида кредит олади.

Қайд этилишича, маблағ Тикланиш ва тараққиёт жамғармаси томонидан 2026—2027 йилларда 10 йил муддатга 3 йиллик имтиёзли давр билан йиллик 5 фоиз ставкада ажратилади. Бу “Ўзбекистон темирйўллари” АЖ ва унинг таркибидаги корхоналар кафиллиги асосида амалга оширилади.

Акциядорлик жамиятига локомотив паркини янгилаш учун 2 та йўловчи тепловоз ва 10 та электровоз, шунингдек, 50 та манёвр локомотивларини харид қилиш лойиҳаси доирасида рўйхат бўйича четдан олиб келинадиган товарлар тегишли муддатда импорт божидан озод этилади. Жамият таркибидаги корхоналарга қўшилган қиймат солиғини 120 кунга кечиктириб тўлашга рухсат берилади.

Қарорнинг асосий мақсади этиб, 2030 йилгача темирйўл транспортида маҳаллий йўналишларда йиллик йўловчи ташиш кўрсаткичини 10,5 миллион нафардан 23,5 миллион нафарга, электропоездлар қатнови ташкил этилган йўналишлар сонини 40 тадан 53 тага етказиш белгиланган.

• Кредит
• Ўзбекистон темир йўллари