“Ҳудудгаз Тошкент” ГТФ комплаенс назорат тузилмалари, “Юқоричирчиқтумангаз” ГТБ, Ўзенергоинспексия ва прокуратура ходимлари иштирокида Тошкент вилоятининг Юқори Чирчиқ туманида табиий газдан ноқонуний фойдаланиш ҳолатларини аниқлаш бўйича назорат тадбирлари ўтказилган.

Тадбир давомида, туманнинг “Фаровон” МФЙда жойлашган хонадонларнинг бирида 70 сотихлик ҳудудда 2 та иссиқхона (50 сотих лимон, 20 сотих қулупнай) борлиги маълум бўлган. Хонадондаги газ жиҳозлари ўрганилганда 2 дона газда ишловчи иситиш аппарати (ОАГВ), 2 дона (2 ва 4 ёндиргичли) газ плитасидан ҳеч қандай лойиҳа ҳужжатларисиз фойдаланиб келинаётгани аниқланган.

Бу ҳақда Энергетика вазирлиги ахборот хизмати хабар берди.

Шунингдек, хонадондаги электрон газ ҳисоблаш ускунаси текширилганда мазкур ҳисоблагич рўйхатдан ўтказилмагани ва таъминот корхонаси билан тегишли шартнома тузилмагани маълум бўлган.

“Ҳолат юзасидан далолатнома тузилиб, сарфланган табиий газ ҳажми қонунчиликда белгиланган тартибда қайта ҳисоб-китоб қилинди. Истеъмолчи томонидан 649 миллион сўмлик зарар етказилгани маълум бўлди”, – дейилади хабарда.

• Газ
• Qoidabuzarlik
• Yuqori Chirchiq