Йиғилишда Тошкент шаҳрини куз-қиш мавсумига тайёрлаш, коммунал ва энергетика инфратузилмасининг барқарор ишлашини таъминлаш бўйича амалга оширилган ишлар муҳокама қилинди.

“Долзарб 40 кунлик” доирасида шаҳардаги 2 минг километр ариқ чиқиндилардан тозаланди, 500 минг туп мевали ва манзарали дарахт ҳамда гул кўчатлари экилди.

Электр таъминотини яхшилаш мақсадида муаммо кузатилган 114 та маҳалладаги трансформаторлар янгиланди, 443 таси таъмирланди. Шунингдек, 600 километр электр тармоғи алмаштирилиб, 2,5 мингта ёритиш устуни соз ҳолатга келтирилди.

Ноқонуний электр ва газ истеъмолининг олдини олиш ҳамда энергия тежамкор технологияларни жорий этиш натижасида бир ойда пойтахтда 11 миллион киловатт-соат электр энергияси ва 10 миллион куб метр табиий газ тежалди. Электр ва газ тармоқларидаги йўқотишлар эса қарийб 1 фоизга камайтирилди.

Мутасаддиларга ноқонуний қурилмаларни аниқлаш, қонун устуворлигини таъминлаш ва жазо муқаррарлиги бўйича ишларни тизимли давом эттириш топширилди.

Таъкидланганидек, Олмазор туманида кўриб чиқилган вазифалар пойтахтнинг барча туманлари учун бирдек долзарб ҳисобланади.

Йиғилиш якунида пойтахт туманлари ҳокимлари ва бошқа масъул раҳбарларнинг ахбороти тингланди.