300 ga yaqin O‘zbekiston fuqarosi Ukrainada qolayotganini hamda yaqin orada O‘zbekistonga qaytarilishi mumkinligini ma’lum qilindi. Bu haqda Oliy Majlis Senatining yigirma to‘rtinchi yalpi majlisida nutq so‘zlagan tashqi ishlar vaziri Abdulaziz Kamilov aytib o‘tdi.

“Bugungi kunda 300 ga yaqin O‘zbekiston fuqarosi Ukrainada bo‘lib turibdi. Ular bilan muloqotdamiz, hammalariga yordam beryapmiz. Bitta murakkab masala – xavfsizlik masalasi, lekin yaqin orada buning ham yechimini topib, fuqarolarimizni O‘zbekistonga qaytarishga harakat qilamiz”, – degan O‘zbekiston tashqi ishlar vaziri.

Qayd etish joiz, O‘zbekiston TIV 28-fevraldan 15-martga qadar 26 ta aviareys tashkillashtirilgani, diplomatik vakolatxonalarning faol sa’y-harakatlari natijasida harbiy harakatlar bo‘layotgan hududdan 5 884 nafar O‘zbekiston fuqarosi olib chiqilgani haqida ma’lumot bergan edi. Shu jumladan 300 nafar ayol, 700 dan ziyod 14 yoshgacha bo‘lgan bolalar, 40 nafar imkoniyati cheklangan shaxslar, shuningdek, talabalar va mehnat migrantlari O‘zbekistonga qaytarilgan.

• Abdulaziz Kamilov
• Tashqi ishlar vazirligi
• Ukraina