CNNning xabar berishicha, 1-oktyabrga o‘tar kechasi AQSh hukumati rasmiy ravishda ishini to‘xtatdi. Sabab – Kongress va prezident Donald Tramp o‘rtasida byudjet bo‘yicha kelishmovchilik yuzaga kelgani. Bu so‘nggi olti yil ichida birinchi marta bunday holat sodir bo‘layotgani qayd etilmoqda.

Tramp muammoga demokratlarni ayblab, ularning talablari sog‘liqni saqlash dasturlariga zarar yetkazishini ta’kidladi. Unga ko‘ra, murosa bo‘lmasa, minglab davlat xizmatchilari ishsiz qolishi mumkin. Demokratlar “Obamacare” dasturi orqali kam ta’minlanganlar uchun qo‘shimcha mablag‘ ajratilishini istasa, respublikachilar vaqtinchalik moliyalashtirishni faqat noyabrgacha uzaytirishni taklif qilgan edi.

Hukumat faoliyatining to‘xtashi natijasida bir qancha federal idora va agentliklar ishlamayapti. Ma’lumotlarga ko‘ra, 750 minggacha xodim vaqtincha ishdan bo‘shatilishi mumkin. Biroq harbiylar, pochta va ijtimoiy dasturlar o‘z faoliyatini davom ettirmoqda.

So‘nggi 50 yil davomida AQSh Kongressi 21 marta shunday moliyaviy boshi berk ko‘chaga kirgan. Eng uzoq davom etgani 2018-yilda bo‘lib, hukumat 35 kun ishlamay qolgan edi.

• AQSh