“Videohosting AQSh prezidenti Donald Trampning 2021-yilda vaqtincha bloklangan akkaunti bilan bog‘liq sud da’vosini hal qilish uchun 24,5 million dollar to‘lashga rozi bo‘ldi”, – deb xabar berdi Associated Press.

Bitim shartlariga ko‘ra, bu summaning 22 million dollari Oq uyda bal zalini qurish uchun mas’ul bo‘lgan Trust for the Nation Mall tashkilotiga yo‘naltiriladi. Qolgan mablag‘ esa ish bo‘yicha boshqa da’vogarlar o‘rtasida taqsimlanadi, ular orasida yozuvchi Naomi Vulf va Amerika konservativ ittifoqi ham bor.

YouTube’ga egalik qiluvchi Alphabet kompaniyasi Tramp bilan sud da’vosini hal qilgan uchinchi yirik texnologik kompaniyaga aylandi. Yanvar oyida Meta Platforms Trampning Facebook akkaunti bloklangani bilan bog‘liq da’voni hal qilish uchun 25 million dollar to‘lashga rozi bo‘lgan edi. X (sobiq Twitter) esa Tramp tomonidan berilgan da’voni 10 million dollar evaziga hal qilgandi.

Donald Trampning Facebook, Instagram, YouTube va Twitter akkauntlari 2021-yil 6-yanvarda uning tarafdorlari prezidentlik saylovi natijalaridan norozi bo‘lib, Kapitoliy binosiga bostirib kirganidan so‘ng bloklangan edi. Ijtimoiy tarmoqlar rahbariyati Trampning postlari bu harakatni qo‘llab-quvvatlagan deb hisoblagan.

• Tramp
• YouTube