Isroil bosh vaziri Binyamin Netanyaxu 28-sentyabr kuni Qatar bosh vaziri Muhammad bin Abdurahmon Ol Soniyga qo‘ng‘iroq qilib, 9-sentyabr kuni Isroilning Dohaga bergan zarbasi oqibatida Qatar xavfsizlik xizmati xodimi halok bo‘lgani uchun uzr so‘radi. Bu haqda Axios xabar berdi.

Nashrning ta’kidlashicha, “uzr so‘rash” Qatarning G‘azodagi urushni to‘xtatish va garovga olinganlarni ozod qilish bo‘yicha muzokaralarda Isroil va XAMAS o‘rtasidagi vositachiligini qayta tiklash uchun asosiy shart bo‘lgan.

Ma’lum qilinishicha, Netanyaxuning qo‘ng‘irog‘i uning Vashingtonga rasmiy tashrifi chog‘ida amalga oshirilgan.

Amerika va Isroil rasmiylarining fikricha, Qatar vositachiligining qayta tiklanishi kelishuvga erishish uchun muhim hisoblanadi.

9-sentyabr kuni Dohaga berilgan zarba XAMAS yetakchilariga qaratildi, biroq buning oqibatida asosan quyi darajadagi amaldorlar halok bo‘ldi. Isroil rasmiylari nishon “yuqori martabali terrorchilar” bo‘lganini da’vo qilmoqda, ammo operatsiya jiddiy diplomatik inqirozga olib kelganini tan olmoqda. Bir qator arab davlatlari Isroilning harakatlarini keskin qoraladi.

• Binyamin Netanyaxu
• Isroil
• Munosabat
• Qatar