Qo‘shma Shtatlar, Janubiy Koreya va Yaponiya Rossiya hamda Shimoliy Koreya o‘rtasidagi ehtimoliy qurol-yarog‘ bitimiga qarshi choralar ko‘rishga va’da berdi. Bu haqda Yonhap agentligi Janubiy Koreya Tashqi ishlar vazirligiga tayanib xabar berdi.

Tegishli bayonot Nyu-Yorkda Janubiy Koreya Tashqi ishlar vaziri Pak Jin va uning amerikalik va yaponiyalik mavqedoshlari Entoni Blinken va Yoko Kamikava o‘rtasidagi uchrashuvda ma’lum qilindi.

Uchrashuvda vazirlar KXDR yetakchisi Kim Chen Inning Rossiyaga tashrifi va uning Rossiya prezidenti Vladimir Putin bilan uchrashuvi, xususan, Moskva va Pxenyan o‘rtasidagi qurol-yarog‘ bo‘yicha ehtimoliy kelishuv mavzusini muhokama qilgan.

Uchta davlat Tashqi ishlar idoralari rahbarlari Rossiya va Shimoliy Koreya o‘rtasidagi harbiy hamkorlikdan chuqur xavotir bildirib, ehtimoliy qurol-yarog‘ kelishuvi Birlashgan Millatlar Tashkiloti Xavfsizlik Kengashi rezolyutsiyalarini buzishini ta’kidladilar.

Shimoliy Koreya yetakchisining Rossiya Federatsiyasi prezidenti bilan uchrashuvi joriy yilning 13-sentyabr kuni Amur viloyatidagi “Vostochniy” kosmodromida bo‘lib o‘tgan edi.

• AQSh
• Jahon
• Janubiy Koreya
• KXDR
• Qurol
• Rossiya
• Shimoliy Koreya
• Yaponiya