Ukraina Prezidenti Vladimir Zelenskiy bir yil avval tayinlangan Bosh vazir Yuliya Sviridenkoni almashtirishni rejalashtirayotganini ma’lum qildi. Bu haqda u X ijtimoiy tarmog‘idagi sahifasida yozdi. Zelenskiy Sviridenko o‘rniga kimni Bosh vazirlikka tavsiya qilishi yoki uning o‘zi qaysi lavozimga o‘tishini ochiqlamadi. Shuningdek, u huquqni muhofaza qiluvchi organlar rahbarlari o‘rtasida ham o‘zgarishlar bo‘lishini bildirib, bu qaror “yangilangan siyosiy strategiya”ni amalga oshirish uchun zarurligini ta’kidladi.

“Yuliyaga Bosh vazir sifatidagi aniq, barqaror va samarali mehnati, shuningdek, Ukraina jamoasidagi ko‘p yillik xizmatlari uchun minnatdorlik bildiraman. Men unga asosiy hamkorlarimizdan biri bilan munosabatlarning yangi va muhim yo‘nalishiga rahbarlik qilishni taklif qildim”, — deb yozdi Zelenskiy. U, shuningdek, parlament bilan hamkorlikda hukumat tarkibida tegishli o‘zgarishlar amalga oshirilishini kutayotganini bildirdi.

Ukraina qonunchiligiga ko‘ra, Bosh vazirning iste’fosi parlament tomonidan tasdiqlanishi kerak. Bu esa butun hukumatning iste’foga chiqishiga olib keladi. Mahalliy OAV va parlament deputatlari ehtimoliy nomzodlar qatorida sobiq Bosh vazir va amaldagi Energetika vaziri Denis Shmigal, Raqamli transformatsiya vaziri Mixaylo Fedorov hamda “Naftogaz” kompaniyasi rahbari Sergey Koretskiy nomlarini tilga olmoqda. Ma’lumot uchun, iqtisodchi Yuliya Sviridenko 2025-yil iyul oyida Ukraina Bosh vaziri etib tayinlangan edi.