Toshkent metropoliteniga yana 3 ta zamonaviy to‘rt vagonli harakat tarkibi olib kelindi. Bu haqda metropoliten matbuot xizmati xabar berdi. Qayd etilishicha, yangi poyezdlar liniyalarga bosqichma-bosqich chiqarilib, poyezdlar harakati intervalini qisqartirish, yo‘lovchilarga ko‘rsatilayotgan xizmat sifatini oshirish hamda eskirgan harakat tarkiblarini zamonaviy poyezdlar bilan almashtirishga xizmat qiladi.

Shuningdek, yangi tarkiblar tashish quvvatini oshirish, harakat jadvalining barqarorligini ta’minlash va ortib borayotgan yo‘lovchilar oqimiga samarali xizmat ko‘rsatish imkonini beradi. Metropolitenni modernizatsiya qilish ishlari davom etadi. Rejaga ko‘ra, 2026-yil yakuniga qadar Toshkent metrosiga yana 11 ta zamonaviy harakat tarkibini olib kelish ko‘zda tutilgan. Eslatib o‘tamiz, 2026-yil 1-sentabrgacha Toshkent shahridagi jamoat transporti va shahar atrofi elektr poyezdlari uchun integratsiyalashgan to‘lov tizimi joriy etilishi rejalashtirilgan.