Qoraqalpog‘iston Respublikasida kuzatilayotgan kuchli jazirama sababli Nukus shahri va yana 8 ta tumandagi davlat hamda nodavlat maktabgacha ta’lim tashkilotlari faoliyati vaqtincha to‘xtatiladi. Bu haqda Qoraqalpog‘iston Respublikasi Maktabgacha va maktab ta’limi vazirligi ma’lum qildi.

Qayd etilishicha, mazkur qaror bolalar salomatligini yuqori haroratning salbiy ta’siridan himoya qilish hamda ularning xavfsizligini ta’minlash maqsadida qabul qilingan. Faoliyatni vaqtincha to‘xtatish muddatlari shahar va tuman hokimlarining qarorlari hamda sanitariya-epidemiologiya xizmatining xulosalari asosida belgilangan.

Vaqtincha yopiladigan hududlar va muddatlar:

• Nukus shahri — 13–18-iyul;
• Amudaryo tumani — 13–15-iyul;
• Beruniy tumani — 13–17-iyul;
• Xo‘jayli tumani — 13–18-iyul;
• Taxiatosh tumani — 13–17-iyul;
• Shumanay tumani — 13–17-iyul;
• Mo‘ynoq tumani — 13–17-iyul;
• Qonliko‘l tumani — 13–17-iyul;
• To‘rtko‘l tumani — 13–17-iyul.

Vazirlik ota-onalardan farzandlari salomatligiga alohida e’tibor qaratish, ularni kunning eng issiq vaqtlarida ochiq havoda uzoq qoldirmaslik hamda zarur ehtiyot choralariga rioya qilishni so‘radi.