Shavkat Mirziyoyev tomonidan 11-fevral kuni imzolangan qonun bilan Ma’muriy javobgarlik to‘g‘risidagi kodeksga qator o‘zgartirishlar kiritildi.

Hujjatga muvofiq, endilikda xalqaro va shaharlararo avtomobil tashuvlarini amalga oshirishda haydovchilarning mehnat va dam olish rejimini buzganlik uchun javobgarlik belgilanadi. Bunday huquqbuzarlik BHMning yetti baravari miqdorida (2 million 884 ming so‘m) jarima solishga sabab bo‘ladi. Mazkur talab M3 va N3 toifali avtotransport vositalarida yo‘lovchi va yuklarni 400 kilometr va undan ortiq masofaga tashish jarayonlariga tatbiq etiladi.

Shuningdek, 125-moddaga kiritilayotgan o‘zgartirishlarga ko‘ra, xalqaro va shaharlararo tashuvlarni raqamli nazorat uskunalarisiz (taxografsiz), nosoz taxograf bilan yoki uni o‘chirib qo‘ygan holda amalga oshirish, shuningdek, haydovchining taxograf kartasisiz harakatlanishi ham javobgarlikka sabab bo‘ladi.

Amaldagi qonunchilikda shaharlararo va xalqaro yo‘lovchi tashishni amalga oshirayotgan avtobuslarda taxograf (nazorat qurilmasi) o‘rnatilgan. Bu qurilma haydovchilarning ish vaqti, dam olish vaqti, tezlik va masofani yozib boradi. Qurilmani o‘chirgan holda avtomobil boshqarganlik uchun javobgarlik mavjud. Biroq ushbu qurilmadagi ma’lumotlarga asosan haydovchining mehnat va dam olish rejimiga bo‘ysunmagani yuzasidan javobgarlik belgilanmagandi.

Shu bilan birga, haydovchining ish vaqti davomiyligi 9 soatdan ortiq yoki yo‘nalish masofasi 400 kilometr va undan ortiq masofaga yo‘lovchi va yuklarni tashishda haydovchilarning mehnat va dam olish rejimi Transport nazorati inspeksiyasi tomonidan nazorat qilib boriladi.

Yangi tartibga ko‘ra, tashishlar xavfsizligini ta’minlash bo‘yicha qoida va talablarni buzgan mansabdor shaxslar ham ma’muriy javobgarlikka tortiladi. Qonun bilan bir xil toifadagi huquqbuzarliklar uchun turlicha jarima qo‘llanilishining oldini olish hamda javobgarlikni aniq belgilash maqsad qilingan. Hujjat 2026-yil 10-maydan kuchga kiradi.