O‘tgan hafta Fransiya hukumati sanksiyaga uchragan rossiyalik milliarder Alisher Usmonovga tegishli ikkita vertolyotni Lazurn qirg‘og‘ida muzlatib qo‘ygan edi. Fransiya Iqtisodiyot va Moliya vazirligi vakili Forbes nashriga 22 mart kuni Le-Kastel va Monte-Karlo shahrida ikkita vertolyot “Airbus EC-175” va “Eurocopter EC-155” muzlatilganini tasdiqladi.

68 yoshli Usmonov Rossiyadagi eng boy odamlardan biri. U “Facebook”ning birinchi investorlaridan biri bo‘lgan. Uning eng yirik xoldingi metall giganti “Metalloinvest”dagi aksiyalari bo‘lib, u Xitoyning “Xiaomi” maishiy elektronika kompaniyasining ulushlariga, shuningdek, telekommunikasiya, tog‘-kon sanoati va ommaviy axborot vositalaridagi kichikroq xoldinglarga ega.

Qayd etilishicha, M-DLBR belgisi bo‘lgan vertolyot – “Airbus EC-175” oxirgi marta 2021 yil 13 noyabrda Le-Kastelda ro‘yxatga olingan va M-DLBA belgisi bo‘lgan “Eurocopter EC-155” esa oxirgi marta Monte-Karloda 1 mart kuni ko‘rilgan. Ikkala vertolyot ham Britaniyaning Man orolida ro‘yxatga olingan, biroq 3 mart kuni ro‘yxatdan chiqarilgan. Man orolining samolyotlar reyestriga ko‘ra, M-DLBR “Crystall Sky Limited”kompaniyasiga, M-DLBA esa “Margaux Aviaton Limited” kompaniyasiga tegishli. Har ikki korxona Kayman orollarida joylashgan. “Forbes” ikki vertolyotning narxini yangi va foydalanilgan model narxlariga asoslanib, 26 million dollarga baholagan.

Usmonov matbuot kotibining “Forbes”ga aytishicha, “Arsenal” futbol klubi sobiq xo‘jayini vertolyotlarga ega emas. Mulkning katta qismi, shu jumladan ikkita vertolyot qaytarib olinmaydigan va ishonch asosida boshqarishga berilgan. 

“Usmonov ularga egalik qilmaydi. Mulkni oilaviy ishonchlarga o‘tkazish jarayoni ko‘p yillar oldin boshlangan va sanksiyalardan qochish yoki boylikni yashirish bilan hech qanday aloqasi yo‘q edi”, – dedi matbuot kotibi.

• Airbus
• Alisher Usmonov
• Fransiya
• Samolyot