“HoiINDI” taxallusi ostidagi dizayner “Huawei P60 Pro” hali e’lon qilinmagan flagman smartfonining taxminiy ko‘rinishi aks etgan yuqori sifatli renderlarni internetga joyladi. Ilgari tarmoqda qurilmaning orqa tomoni tasvirlari paydo bo‘lgan edi, endilikda esa bo‘lajak foydalanuvchilarga old panel ko‘rsatildi.

Ko‘rsatilgan tasvirlar hamda videolar mish-mishlar va sizdirilgan ma’lumotlarga asoslangan. Ta’kidlanishicha, kelgusi “Huawei P60” va “P60 Pro”ning haqiqiy dizayni bunday ko‘rinishga ega bo‘lmasligi mumkin. Aytgancha, “Huawei”ning o‘zi ham P-seriyasidagi yangi qurilmalarning chiqarilishi haqida hech qanday rasmiy ma’lumot e’lon qilgani yo‘q.

Taxminlarga ko‘ra, “Huawei P60 Pro”ning burchaklari qiyshiq ekranga ega bo‘ladi, markazda selfi kamerasi, orqa tomonda esa juda ko‘p kameralar, jumladan, teleskopik linzali modul joylashadi. Oddiy “Huawei P60”tekis ekran va oddiyroq kameralar to‘plamiga ega bo‘lishi kutilmoqda.

Mish-mishlarga ko‘ra, “Huawei P60 Pro” 120 Gs yangilanish tezligiga ega 6,6 dyuymli QHD+ OLED ekran, 5 G’siz “Snapdragon 8 Gen 2” yoki “Snapdragon 8+ Gen 1” prosessori hamda 100 vatt simli va 500 vatt simsiz zaryadlash quvvatiga ega 5000 mA/soat batareya bilan jihozlanadi. Shuningdek, u 50 megapikselli asosiy, 50 megapikselli ultra keng va 64 megapikselli telekameraga ega. Shuningdek, IP68 standarti bo‘yicha suvni muhofaza qilish haqida ma’lumot mavjud.

“Huawei” kompaniyasining yangi flagmanlari taqdimoti joriy yilning mart oyida bo‘lib o‘tishi kutilmoqda. Smartfonning narxi esa 1150 AQSH dollari miqdorida bo‘lishi kutilmoqda.

Avvalroq, “Huawei” yangi biznes yo‘nalishlarini yaratishga majburligi ma’lum qilingan edi. Shuningdek, kompaniyaning 300 millionga yaqin qurilmalari uchun foydalaniladigan o‘zining “Harmony” operasion tizimini chiqardi.

Bundan tashqari kompaniyaning 2022 yil birinchi yarmidagi sof foydasi 52 foizga kamaygan edi. Ushbu ko‘rsatkichlarga murakkab iqtisodiy vaziyat ta’sir ko‘rsatgan, bu esa ishlab chiqaruvchining tovarlariga bo‘lgan talabning qisqarishiga olib keldi. Natijada AQSH sanksiyalari ostida qolgan “Huawei” kompaniyasining ahvoli yanada og‘irlashdi.

• Huawei
• Taqdimot
• Xitoy